دوکتور عبدالله عبدالله رییس اجراییه جمهوری اسلامی افغانستان بعد از دیدار و ملاقات با نخست وزیر جمهوری ازبیکستان در مزار شریف، پس از چاشت روز دوشنبه، 10 سرطان برای ملاقات با جلالتمآب ستر جنرال عبدالرشید دوستم معاون نخست ریاست جمهوری و رهبر جنبش ملی اسلامی افغانستان وارد ولایت جوزجان گردید.
در میدان هوای جوزجان جلالتماب سترجنرال عبدالرشید دوستم معاون نخست ریاست جمهوری، والی ولایت جوزجان، مقام‌های نظامی و باشندگان پرشور این ولایت از رییس اجراییه کشور استقبال کردند. رییس اجراییه بعد از معاینه قطعه تشریفات به منزل سترجنرال عبدالرشید دوستم تشریف برد.
رییس اجراییه در جریان اقامت خود در ولایت جوزجان، با جلالتمآب سترجنرال عبدالرشید دوستم معاون اول ریاست جمهوری، مقام‌های ملکی و نظامی ولایت جوزجان و متنفذان و اعضای جامعه مدنی این ولایت دیدار می‌کند.
